أبد .. ما جيت ابارك لك ولكن جيت باوصّيك

أبد .. ما جيت ابارك لك ولكن جيت باوصّيك
على الي ناوي ٍ تدخل بها الليله .. مُعذّبْتي

ترى لولا الظروف اللي عطتْك وحدّت محاكيك
قسم بالله ما تدخل عليها لو على رْقبْتي

ولكنّ النصيب اقوى ولا ادري ويش اسوّي فيك
نعم .. صارت معزّبتك .. ولا صارت معزّبْتي

كذا شاءت بنا الأقدار تحرمني لجل تعطيك
كذا لازم عشان تفوز إنت .. أخسر بتجربْتي

تراها غاليه جداً .. وتكفى .. والله يخليك
تدللها .. تدلعها .. تنسّيها مصاحبْتي

أنا من كثر ما اغليها أحس اني بديت اغليك
ولا تسأل بأيّة حق ولا ّ وش مناسبْتي

لإنك لو بتسألني بتسمع شيء ما يرضيك
لذا ياخوي لا تسأل ولا تسمع لأجوبْتي

أبيك تحطها في داخل عيونك وبين ايديك
وهي دلوعه اعتادت على كثرة مداعبْتي

فداعبها شوي شوي حتى تشتهي طاريك
وشاغبها إلين تقول لك: بطّل مشاغبْتي

واذا هي مالها خلقك..ولا تضحك ولا تسلّيك
تحمّلها وإسألها: يا عمري ليه عصّبْتي

وبالك اسمع انّك يوم تضربها وهي تشكيك
ما يحتاج اورّي لك بفن الضرب موهبْتي

صحيح انك بتملكها ومعك الصك بالتمليك
وانا عارف حدود الله ومن حقك معاقبْتي

ولكن قلّها المجنون وصّاني وهو يعنيك
يقول انّه بينتظرك ولو شيّب وشيّبْتي

وانا مجنونها اللي ما نساها وانت ما يمديك
تغطّي ذكرياتي في هواها.. وربْع تجربْتي

أحس اني تماديت بكلامي.. والغضب حاديك
ولو انّك في مكاني ما تفكّر في محاسبْتي

كفاك اني تركت الليله اشغالي عشان اجيك
دخلت القاعه برجلي ولا ادري ويش عاقبْتي

وانا ما جيت اخرّب عرسك الليله ولا أذّيك
أنا جيتك عشان اخاطبك واسمع مخاطبْتي

توصّى..وانتبه..واحرص عليها والله يهنّيك
ترى كل الكلام اللي طلَع من ضيقيَ وكبْتي

ولكن ما قدرت انّي أقوله وانت ما يخفيك
أخاف انّي إذا قلته تقوم وتقطع رْقبْتي

قويه القصيد

الله يعطيك العافيه على النقل الرائع

صراحه قصيده رائعه جدا

بس هل تتوقع انه هذا الحب الحقيقي

طيب وين الغيره رايح يوصي زوجها عليها

ما ادري فيها مبالغه كبيره ما اتوقع الي يحب راح يتنازل عن محبوبه مهما كانت الضروف

أوفقك الرأي بأن المحب لا يستغنى عن محبوبه
بسهوله

تحياتى لك

اخي الكريم

القصيدة جدا رائعة واورع مافيها احساس الحب الذي مازال قائما على الرغم بنهاية المصير

لاشك بانه يحبها لدرجة انه يوصى عليه

ولكن ربما يكون لعدم ارتباطهما ضروف شديدة

ودليل حبه لها انه لا يتهمها بخيانة ولم يحقد عليها بالعكس يدعي لها بالخير


دمت بخير وعافية
أختكـ
موج البحر